Masobra P300,000 nga balor sang ilegal nga druga ang narekober sa tatlo ka mga indibidwal sa ginpatigayon nga drug buybust operation sa Prk. Sambag, Barangay Pahanocoy, Bacolod City kahapon sang aga.
Ginkilala ang mga nagkaladakpan nga sanday Freddie Denisa 54 anyos, residente sang Prk Kaingin, Barangay Tangub; Raymond Alayon, 29 anyos, residente sang Prk. Calantas Abada Sky, Brgy. Vista Alegre; kag Jessie Torres 56 anyos residente sang Thass II Subd., Brgy. Taculing, Bacolod City.
Sa interview sang Bombo Radyo Bacolod kay Police Captain Greeky Cayao, station commander sang Bacolod Police Station 8, may yara sila sang impormasyon nga ang ila nga target ang nagabaligya gid man sang illegal nga druga sa bahin sang Florenceville Subdivision sa Barangay Granada gani nagpatigayon sila sang buybust operation.
Suno kay Cayao, madugay man ang ila nga ginpatigayon nga monitoring antes nga napatigayon ang drug buybust operation.
Natigayon nga makuha sa mga nagkaladakpan ang 52 grams sang suspected shabu kag ginabanta nagabalor sang P353,600.
Ang duha sa nadakpan ang nakaagi napriso bangud sa illegal nga druga samtang ang isa ang newly identified.
Aminado man ang station commander nga mabudlay man nga madakpan ang mga subject person sa ginpatigayon nga drug buybust operation bangud may yara man ang mga ini sang mga look-out agud mahibaluan ang hulag sang mga kapulisan.
Nakahunong na ang mga ini sa Bacolod Police Station 8 kag magapangatubang sang kaso sa paglapas sa RA 9165 ukon Comprehesive Dangerous Drugs Act of 2002.
