Tatlo ka lalaki, nakuhaan sang masobra P500,000 nga suspected shabu sa Barangay Villamonte

Arestado ang tatlo ka mga lalaki nga nakuhaan sang masobra sa P500,000 nga balor sang suspected shabu sa Purok Sulom Dos, Brgy Villamonte, ciudad sang Bacolod, kahapon, alas-7:30 sang gab-i.

Ang mga suspetsado ang ginkilala nga sanday Jerry Iglesia, alyas Pirot, 54 anyos, kasado, kag nagatrabaho bilang drayber sang jeep; Ruel Ocajada, 27 anyos, single; kag Raffy Susano, 28 anyos, single, wala sang trabaho, lunsay mga residente sang nasambit nga lugar.

Nakuha sa paghinakop sang tatlo ang siyam ka sachet sang suspected shabu nga ginabanta nagabug-at sang 85 grams kag nagabalor sang kapin P578,000.

Sa karun yara na sa kustodiya sang Bacolod City Police Office para mangatubang sang nagakaigo nga kaso.