Aminado ang assistant director sang Commission on Election – Negros Island Region nga may tatlo local government units nga nakaangkon sang minor problems sa Final Testing and Sealing (FTS) sang mga Automated Counting Machines (ACMs).
Sa interview sang Bombo Radyo Bacolod kay Atty Jossil Macute, ang FTS na ang ulihi nga process sa preparasyon sang Comelec sa 2025 National and Local Elections.
Kahapon, dulungan nga ginpatigayon ang FTS sa Negros Island Region, apang nakaangkon sang problema sa banwa sang Moises Padilla kag Sagay City sa Negros Occidental kasubong man sa isa ka LGU sa Negros Oriental.
Paathag ni Macute, nga sala ang nadeliver nga USB sa nagakadapat nga polling precinct.
Ini ang kinahanglan pa nga ireconfigure sa technical hub sa Office of the Provincial Election Supervisor sa Bacolod City.
Suno diri, alas-7:00 sang gab-i na sang makabalik ang comelec personnel bangod sa malawig nga travel gani nadesisyonan nga kaina na lamang alas-9:00 sang aga iresume ang FTS.
Ginapakamaayo man ni Macute nga nangin epektibo man ang ila nga contingency plan kag nakita nga mas madasig sa karun ang tikang sa mga technical difficulties.
Hugot nga nagapati ang Comelec official nga wala na sang delays sa eleksyon sa Mayo 12.
Ginpasalig man sini nga secured ang mga election parapernalia kag maggwardia nga security forces kasubong man mga active watchers sang mga kandidato.
