BACOLOD CITY-Nadugangan sang tatlo pa gid ka mga nagpositibo sa coronavirus disease 2019 (COVID-19) ang probinsya sang Negros Occidental subong nga adlaw.
Ini amo sanday Patient No. 25 nga isa ka 30-anyos nga lalaki kag residente sang Hinobaan; Patient No. 26 nga isa ka 24-anyos nga lalaki nagikan sa Escalante; kag Patient No. 27 nga isa ka 19-anyos nga babayi nga taga-Cauayan.
Lunsay mga locally stranded individuals ang mga ini nagikan sa Cebu.
Sanday Patient No. 25 kag 26 ang yara sa quarantine facility sa ila tagsa ka mga local government units (LGUs) samtang si Patient No. 27 naman ang naka-quarantine sa Provincial Healing Center sa banwa sang EB Magalona.
Madumduman nga kahapon ginkumpirmar ni Negros Occidental Governor Eugenio Jose “Bong” Lacson nga siyam na ka mga COVID patients sa probinsya ang naka-recover.
Sa karon, 18 pa ang active cases sa Negros Occidental.
Samtang, nagapabilin naman sa 22 ang kaso sang coronavirus sa ciudad sang Bacolod.
