Padayon nga nagapanawagan si Trisha Antiquera sa tatlo sini ka himata nga gin-abduct sang mga wala nakilal-an nga mga persona sa Brgy Vista Alegre, Bacolod City, sang Hunyo 2, alas- 9:30 sang gab-i.
Nagpadulong kahapon si Trisha sa estasyon sang Bombo Radyo Bacolod para isaysay ang natabo nga pagpang-abduct sa iya iloy nga si Loreville Antiquera, live- in partner sang iya iloy nga si Joen Villacojer kag sa iya mismo live-in partner nga si Junel Nangan.
Suno kay Trisha, sang Hunyo 2, masugat kun tani sa iya si Nangan apang nag-upod na lamang ang iya iloy kag si Joen kasubong man ang pito ka tuig sini nga hinablos kag ang iya nga apat ka tuig nga bata para kun tani dululungan nga manyapon.
Apang, ginkakibot sini nga nagliko sa Brgy Vista Alegre ang iloy sini nga si Loreville kaupod si Villacojer samtang nagasakay sa motorsiklo kag amo man nga nagliko si Nangan sakay man sa isa ka motorsiklo kaupod ang duha ka bata.
Hinali na lamang nga may isa ka avanza taxi nga nag-untat nga nagbalabag sa ila.
Sa panaysayon sang pito ka tuig nga bata nga babayi nga hinablos ni Trisha, may mga lalaki nga may dala nga dalagko nga armas ang naggwa sa salakyan.
Nagdalagan naman ang hinablos ni Trisha sa isa ka lalaki nga magalabay lamang kuntani sa area, kag nawitness sang lalaki sang ginpasulod ang isa ka lalaki sa taxi nga gilayon nga naglakat kasubong man nga may yara pa sang apat ka lalaki nga nagamotorsiklo nga ginapatihan nagserbe nga look-out.
Samtang, suno naman sa apat ka tuig nga bata nga lalaki ni Trisha, may yara sang masobra lima ka lalaki sa sulod sang salakyan kag si Villacojer ginpapungko sa likod kag ginsumbag kag ginlampusan sang armas-luthang, amo nga may yara sang mga dugo ang bayo sang apat ka tuig nga bata nga ginbilin lamang sa dalan sa ciudad sang Bago.
Nakita sang isa ka police sang Bago City Police Station ang bata kag amo na nga ginpahibalo si Trisha.
Suno kay Trisha, ang rason sa natabo nga abduction ang may kaangtanan kay Villacojer nga bag-ong hilway sa preso sa kaso sini angot sa illegal nga druga kag wala man sang kahilabtanan diri ang iya nga live-in partner nga si Nangan bangod nga wala man ini sang police record apang ang iloy naman ni Trisha nga si Loreville ang may kaso man bilang isa ka fixer sang Land Transportation Office (LTO) samtang nagatrabaho sadto sa Social Security System (SSS).
Tubtob sa karun wala pa sang impormasyon kun diin ang tatlo ka gin-abduct apang nahimo pa ni Trisha nga matext ang cellphone sang isa ila nga sila kun tani magpauli na kag ang nabaton lamang sini nga reply amo nga “Wala di signal”.
