Ginahulat pa sang Kabankalan City Police Station ang latest nga medical bulletin sang driver sang motorsiklo matapos nga nabungguan sang Isuzu hauler truck sa bahin sang Purok Bulaklak, Barangay Salong, Kabankalan City, Negros Occidental sang Lunes sang gab-i, October 26, 2026.
Samtang ang duha ka mga backrider sa motorsiklo ang nakaangkon lamang sang minor nga pilas.
Ginkilala ang mga napilasan nga sanday Nico Dumdum, lalaki, single, 16 anyos; Emeral Pahilagao, babayi, 16 anyos; Ana Loraine Pahilagao, babayi kag lunsay mga residente sang Sto. Manumbala, Barangay Camansi, Kabankalan City, Negros Occidental.
Samtang ang driver sang Isuzu hauler truck ang ginkilala kay Armando Manoyon kag residente sang Sto. Pacao, Bantayan, Kabankalan City, Negros Occidental.
Sa interview sang Bombo Radyo Bacolod kay Police Lt. Col. John Ganzon, hepe sang Kabankalan City Police Station, nagabiyahe ang hauler truck gikan sa transloading area sa Canlamay, Barangay Magballo, Kabankalan City, padulong sa transloading station agud magdiskarga sang kalamay.
Samtang ang motorsiklo ang nagabiyahe gikan sa puluy-an sang mga backrider padulong sa Sto. Bandihan agud nga magpahilot kay Emeral Pahilagao bangud ginapahayag nga nagalain ang iya pamatyag.
Pag-abot sa dululhugon nga bahin sang highway malapit sa sementeryo sa Barangay Salong, nagpreno ang driver sang hauler truck bangud sa dululhugon ang dalan, apang nag-malfunction ang braking system kag wala nagkagat ang preno.
Bangud sini nagmaniobra ini pakadto sa nawala nga bahin sang dalan rason nga nabungguan ang motorsiklo nga nagresulta sa pagkatumba sini.
Bangud sa impact, nag-angkon sang madamo nga pilas sa lawas ang driver kag ang duha ka pasahero sang motorsiklo.
Suno kay Ganzon, si Dumdum nga driver sang motorsiklo ang yara sa kritikal nga kondisyon.
Dugang pa ginahulat ang desisyon sang pamilya sang mga napilasan kun magpasaka sang kaso batok sa driver sang hauler truck.
Ginpahayag man sang hepe nga willing ang tag-iya sang truck nga magbulig sa biktima.
Nakahunong sa karun sa Kabankalan City Police Station ang driver sang truck.
Pahanumdom ni Ganzon nga magsuksok sang safety gears sa tion nga magbiyahe.
Ginpanugyanan ang mga ginikanan sang biktima nga indi pagpasugtan nga magdala sang motorsiklo ang mga kabataan ilabi na ang mga menor de edad.
