Nakadetain sa karun sa Moises Padilla Municipal Police Station ang tatlo ka mga ginaalegar suspetsado sa pagpatay kay Councilor Jolomar Hilario sa sulod mismo sang ila balay sa Barangay Inolingan, Moises Padilla, Negros Occidental, sang Marso 31, 2019.
Sa interview sang Bombo Radyo kay Police Captain Randy Babor, hepe sang Moises Padilla Municipal Police Station, natigayon ang pagsungka sang tatlo sa 14 ka ginaalegar mga suspetsado sa pagpatay sa SB Member sa bulig ni Mayor Ella Garcia-Yulo.
Suno kay Babor, gin-issue ang warrant of arrest sang Pebrero 2021 kag sang Lunes, alas 10:00 sang aga nagpadulong sa estasyon sanday SB member Jose Morito Flores, Punong Barangay Felesa Villaflor kag bana sini nga si Jonathan Villaflor gani ila nalang ginserbehan ang mga ini sang warrant of arrest.
Nagapanindugan naman ang tatlo nga sila ang inosente.
Suno sa hepe, malawig pa nga proseso ang ila agyan kag ang korte nalang ang magadeterminar kun sila ang guilty.
Sa karun yara ang mga ini sa kustodiya sang Moises Padilla Municipal Police Station samtang ginahulat pa ang order kag disposition sang korte.
