Tatlo ka mga ginaalegar drug personalities ang arestado matapos ginraid sang Bacolod Police Station 3 ang isa ka balay nga nagaserbe nga drug den sa Sitio Sibucao, Barangay Banago, kaina sang udto.
Sa interview sang Bombo Radyo kay Police Major Richard Fajarito, station commander sang Bacolod Police Station 3, subject sang operasyon si Debbie Sanchez nga ginakabig street level individual sa illegal nga druga.
Ang balay ni Sanchez ang nagaserbe man nga drug den suno kay Fajarito kag may natabuan nga may nagagamit pa diri sang suspected shabu gani sila ang gin-aresto man.
Ang kaupod ni Sanchez amo sanday Rico Momandre, 43-anyos, residente sang First Farmers, Barangay Dos Hermanas, Talisay City; kag Lucky Joe Tresmin sang Sitio Sibucao, Barangay Banago.
Nakuha sa tatlo ang lima tanan ka elongated sachets sang suspected shabu nga ginabanta nagabalor sang P16,000 kag mga drug paraphernalia.
Suno kay Fajarito, indi magnubo sa isa ka bulan ang surveillance sa subject antes nagmadinalag-on ang buybust operation.
Santo sa ila monitoring, nagapangayaw pa sa Sitio Sibucao ang mga parokyano ni Sanchez kag nagaduso man ini sang shabu sa amo nga lugar.
Sa interview sang Bombo Radyo kay Debbie Sanchez, gin-ako sini nga iya ang narekober nga shabu kag gin-alsada lang ini sa isa ka source.
Suno diri, nagsugod siya sa pagduso sang shabu sang nagpatuman sang lockdown matapos madulaan sang trabaho sa construction.
Panindugan ni Sanchez, kinahanglan niya nga makakita sang kwarta agud nga makabakal sang maintenance nga bulong sang iya iloy kag utod nga may diperensya sa paminsaron.
Sunod diri, wala siya nagagamit sang illegal nga druga kundi nagabaligya lang.
Suno naman kay Rico Momandre, madugay na siya nagagamit sang illegal nga druga apang indi man permanente.
Suno diri, nagapadulong lang siya sa Sitio Sibucao agud nga maggamit sang shabu kun may yara sang kwarta.
