Nagtipon ang pila ka mga transport groups sa ciudad sang Bacolod sa dalan Lacson matapos nga wala sila gin-imbitar sa ginpatigayon nga transport summit.
Kapin alas 8:00 kaina sang aga, nagtipon sa atubang sang L’Fisher Hotel ang transport group nga Bacolod Alliance for Commuters, Operators and Drivers Incorporated (BACOD), Kabakod Negros Transport Coalition Incorporated (KNETCO), kag United Negros Drivers and Operators Center (UNDOC).
Nagbantay naman ang Civil Disturbance Management (CDM) team sa entrance sang hotel bitbit ang ila mga shields.
Apang, nagpalapit ang mga transport leaders sa entrance kag matapos ang pila ka minuto gindagdagan sang dispersal order sang Bacolod City Investigation and Detective Management Unit sa pagpamuno ni Police Lt. Col. Joery Puerto ang mga transport gorups kun sila ang indi maghalin matapos ang 30 ka minutos.
Suno kay Puerto, wala sila sang permit sa pagpatigayon sang rally kag obstruction na sa dalan ang ila ginahimo.
Kun sila naman ang indi magsunod mapilitan ang mga kapulisan nga sila ang dakpon.
Nagpanindugan naman ang transport leaders nga sila ang magatinir kun indi sila pagpasudlon sa transport summit.
Suno kay Lilian Sembrano, presidente sang Kabakod Negros Transport Coalition Incorporated (KNETCO), luyag lamang nila nga maglakip sa trasnport summit agud nga mapalab-ot ang ila bahin.
Ginkwestyon man sini kun ano ang ginatago sa summit kun ngaa wala sila gin-imbitar nga mga transport group.
Pahayag ni Sembrano, mas maayo pa para sa iya nga mapreso sangsa indi mabaton ang ila sentiyemento.
Samtang, gin-aresto ang apat ka mga transport leaders nga wala nagsunod sa dispersal order sang Bacolod City Police Office.
Kaina sang aga nagpatigayon sang rally ang transport group nga Bacolod Alliance for Commuters, Operators and Drivers Incorporated (BACOD), Kabakod Negros Transport Coalition Incorporated (KNETCO), kag United Negros Drivers and Operators Center (UNDOC) .
Ginhatagan sang ultimatum ni Police Lt. Col. Joery Puerto head sang Bacolod City Investigation and Detective Management Unit, ang mga nagarally nga magdisperse alas- 11:20 sang udto apang wala nagsunod ang mga transport groups kag liwat naman sila nga ginhatagan sang duha ka minutos nga ultimatum, nga wala man nila ginsunod.
Napilitan ang kapulisan nga bombahan sang tubig ang mga nagarally kag ini man ang ila ginbasolan sa pagpamungkoy sang bato kun sa diin isa ka pulis ang napilasan.
Natigayon nga naaresto sang kapiulisan sanday BACOD President Rudy Catedral, KNETCO president Lilian Sembrano, kag duha pa gid ka lider sang transport group nga yara na sa kustodiya sang Bacolod Police Station 2.
