Dakop ang isa ka persona sa ginpatigayon nga drug buybust operation sa Purok Calachuchi, Barangay 9, Bacolod City takna alas-8:40 kagab-i.
Suno kay P/Maj. Jovil Sedel, hepe sang Bacolod Police Station 1, ang suspetsado ang ginkilala kay Errol Olorga alyas Diamond.
Suno sa hepe, nakabaton ini sang mga impormasyon nga may nagabaligya sang droga kasubong man nga madamo sang nagagwa kag sulod nga lain-lain nga mga persona sa lugar gani ginsurveillance nila ini.
Nakuha sang paghinakop sang suspetsado ang walo tanan ka mga heat-sealed transparent plastic sachet sang suspected shabu, mga drug paraphernalia, isa ka coin purse kay P200 nga cash.
Ang iligal nga droga ang nagabug-at 1.52 grams may estimated street value nga P12,160.
Nahibaluan nga ang suspetsado ang ginkasuhan na sadtong 2017 apang nakaguha matapos sang tatlo ka tuig.
Samtang, dakop ang maglive-in sa drug buybust operation nga ginpatigayon sa Relocation Site, Barangay Purisima, Manapla, Negros Occidental sang Martes.
Ginpahayag ni P/Maj. Jaynick Bermudez, hepe sang Manapla Municipal Police Station nga ang mga suspetsado ang ginkilala kay Ramilyn Guardiario, 39 anyos kag amo ang subject sa operasyon kag ang live-in partner sini nga si Larry Boy Margario, 25 anyos lunsay mga residente sa nasambit nga lugar.
Ang narecover nga iligal nga droga ang nagabug-at sang 1.69 grams ukon ginabanta nagabalor P10,880.
Samtang gindakop naman si Margario matapos nga makuhaan sang isa ka home-made 12 gauge shotgun ukon sulpak.
Nahibaluan nga plano kuntani sang suspetsado nga magbato sa mga kapulisan kaupod sang grupo apang naunahan ini gani nagpinalagyo nalang ang mga kaupod samtang sya ang nadakpan.
Natalana nga magapangatubang sang kaso nga pagbayolar sa RA 9165 ukon comprehensive dangerous drugs act of 2002 si Guardiario samtang si Margario naman ang magapangatubang sang kaso nga pagbayolar sa RA 10591 ukon illegal possession of Firearms.
