Tatlo ka mga persona ang nagkalapilasan sa separado nga shooting incident nga nagluntad sa ciudad sang Bago kag Kabankalan sang nagligad nga Abril 22.
Padayon karon nga ginadapatan sang pagbulong sa South Bacolod General Hospital si Daniel Balboa, 48-anyos kag residente sang Barangay Napoles ciudad sang Bago.
Sa impormasyon nga nakuha sang Bombo Radyo Bacolod, hinali nalang nga gintiro sang suspetsado nga si Romeo Giganto nga residente man sang amo nga barangay ang biktima.
Nakaangkon sang pilas sa tiyan ang biktima kag nagpalagyo naman ang suspetsado.
Samtang, pilason man sanday Beromeo Pado-ong, 44-anyos kag Christian Adlaon, 21-anyos nga lunsay mga taga-Barangay Tampalon, Kabankalan City.
Nagagwa sa inisyal nga imbestigasyon sang kapulisan nga naga-inom sanday Pado-ong kag ang suspetsado nga si Sammy Uy sa balay ni Adlaon.
Hinali lang nga gintiro sang makapila ka bes ni Uy ang mga biktima.
Nakaangkon sanday Pado-ong kag Adlaon sang mga pilas sa nagkalain-lain nga bahin sang ila lawas.
Gilayon naman sila nga gindala sa Lorenzo Zayco District Hospital para sa nagakaigo nga pagbulong.
