Tatlo ka mga persona ang arestado sa banwa sang Murcia bangod sa paghupot kag pagpalupok sang armas.
Suno kay P/Lt. John Paul Tabujara, hepe sang Murcia Municipal Police Station, nagtawag sa ila ang isa ka concerned citizen agud nga ipalab-ot ang armado nga grupo nga nagsulod sa Sitio Sumbinco, Barangay Damsite, Murcia, Negros Occidental kag nagapalupok sang mga dala nga armas-luthang.
Gilayon naman ini nga ginrespondehan sang alert team.
Nahibaluan nga may nagaluntad nga away sa duta sa nasambit nga lugar.
Ang tatlo ka mga suspetsado ang ginkilala kanday Eldegarde Ramatico, 59 anyos kag Aldy Fernandez, 33 anyos, kaangay nga may asawa kag residente sang Hda. Navalilla, Barangay Buenavista, Murcia kag si Clemente Delos Santos, 51 anyos, may-asawa kag residente sa Hda. San Roque, Barangay Salvacion, Murcia.
Nakuha sa paghinakop sang mga ini ang tag-isa ka unit sang Smith & Wesson 357 caliber revolver nga may unod nga mga bala.
Suno kay Tabujara, isolated ini nga insidente bangod wala sang record nga iligal nga aktibidad ang mga suspetsado.
