Dakop ang tatlo ka mga persona sa ginpatigayon nga buybust operation sa Purok Tangigue, Brgy 1, Bacolod City kaina sang kaagahon.
Ginkilala ang mga suspetsado kanday Mary Grace Lopez, 26-anyos kag residente sang amo nga lugar; live-in partner sini nga si Rommel Aropio, 39-anyos sang amo man gihapon nga lugar kag Tyron Bellosillo, 30-anyos kag residente sang Eufemia Village, Barangay Taculing, Bacolod City.
Sa interview sang Bombo Radyo Bacolod kay P/Capt. Jun Ray Batadlan, hepe sang Bacolod Police Station 8, ginpahayag sini nga sa Purok Kabulakan, Barangay Singcang Airport kuntani ang orihinal nga transaksyon apang natigayon ini sa Barangay 1.
Masobra isa ka semana man ang ginpatigayon nga monitoring sang kapulisan sa mga suspetsado.
Dugang pa ni Batadlan nga ang maglive-in partner ang nagasuplay sang iligal nga druga sa Purok Kabulakan.
Nakuha sa possession kag kontrol sang mga ini ang isa ka P500 nga marked money, isa ka improvised totter kag isa ka pakete sang sigarilyo kag isa ka dako nga sachet kag isa ka elongated sachet sang suspected shabu nga ginabanta nagabug-at sang 2.5 grams kag nagabalor sang P17,000.
Samtang, naaktuhan naman nga may yara sang drug paraphernalia si Bellosillo gani nga gindakop man ini.
Sa karon yara sa kustodiya sang Police Station 8 ang tatlo kag natalana nga pasakaan sang kaso sa paglapas sang Republic Act 9165 ukon Comprehensive Dangerous Drugs Act of 2002.
