Tatlo ka mga Purok sa Barangay Taculing ciudad sang Bacolod ang ginsealed-off matapos magpositibo sa coronavirus disease 2019 ang apat ka mga residente sini nga nagatrabaho sa Office of the Senior Citizens Affairs (OSCA).
Sa interview sang Bombo Radyo Bacolod kay ABC President kag Punong Barangay Lady Gles Gonzales-Pallen sang Barangay Taculing, ginkumpirmar sini nga 20 ka mga balay ang ginsealed-off sa Purok Masagana kag 17 naman sa Purok Lirio samtang gina-assess pa kun pila ang iseal off sa Purok Kabukiran.
Gin-athag naman sini nga indi mga senior citizens ang mga nagpositibo.
Nagapasalamat naman si Pallen nga asymptomatic ang mga pasyente kag lunsay yara karon sa quarantine facility.
Samtang, ang mga pamilya naman sang mga ini ang naka-home quarantine kag ipaidalom man sa RT-PCR test.
Magahatag man sang relief goods kag tubig ang barangay para sa mga apektado nga mga residente.
Nagapangabay naman ang punong barangay sa mga pumuluyo nga nagpalalagyo matapos nila mahibaluan nga ilockdown ang ila nga lugar nga magbalik na sa ila mga balay agud indi na maglapta pa ang virus.
Suno kay Pallen mas maayo nga naka-home quarantine ang mga yara sa 30-meter radius sang balay sang nagpositibo agud nga mamonitor sang otoridad.
