Na-install na ang tatlo ka mga traffic lights nga may Artificial Intelligence (AI) automated system.
Sa interview sang Bombo Radyo Bacolod kay Engineer Loben Rafael Ceballos, pinuno sang Bacolod City Engineer’s Office, na install na ang bag-o nga mga traffic lights sa area sang Bacolod Police Station 6, corner sang North Bound terminal kag Gatuslao Street kag Buri Road sa Barangay Mandalagan.
Magluwas sa AI automated system, ang duha sa mga traffic lights ang may-ara sang push button para sa pedestrian.
Paathag ni Ceballos nga may radar detection ang traffic lights kag sarang sini makita ang numero sang mga salakyan nga yara sa kada dalan.
Pinaagi sini, sarang makadesisyon ang traffic lights kun ano kalawig ang pagpatuman sang GO signal ukon STOP signal agud indi maregulate ang trapiko.
Ang push button ang sarang naman nga mapindot sang mga luyag magtabok kag ini ang magasignal naman sang STOP para sa mga salakyan.
Paathag ni Ceballos nga indi man hinali ang pag-STOP kag may ara paman sang pila ka segundo ang mga salakyan agud makapreparar.
Suno kay Ceballos sa una nga mga sinemana sang implementasyon, pahamtangan sini sang traffic enfocers ang mga traffic lights nga may push button agud magiyahan ang mga pumuluyo sa kun paano ini gamiton.
Apisar nga may kaugalingon nga mga programs, plano ni Ceballos nga himuon centralized ang ila operations.
Ang tatlo ka traffic lights nga may AI automated system ang nagabalor sang kabug-usan nga P16 million.
Magluwas diri, may-ara pa sang lima ka mga panibag-o nga traffic lights nga ihamtang naman sa Lacson extension sa Alijis Road, Burgos Extension sa Sofia Gonzaga Street, Sto Nino Stop sa Barangay 2, Burgos-San Juan Street kag sa Circumferential Road – Araneta Street sa Cegasco sa Barangay Pahanocoy.
