Patay ang tatlo ka menor de edad nga sakay sa motorsiklo matapos mabungguan sang Ceres bus sa bahin sang Hacienda Elenita, Brgy Burgos, Cadiz City pasado alas-9:00 kagab-i, Marso 27.
Ang mga biktima ang ginkilala nga sanday alyas Rolly, 17 anyos, driver sang motorsiklo; alyas Jay, 13 anyos; kag alyas Kimjay, 17 anyos, backriders, lunsay mga residente sang Hacienda Uso, Brgy Burgos, Cadiz City.
Sa interview sang Bombo Radyo Bacolod kay Police Lieutenant Daleen Grace Loreno, Deputy Chief of Police for Administration sang Cadiz City Police Station, suno sa pahayag sang isa ka testigo nga isa ka security guard nga si alyas Arnold, nag-overtake ang motorsiklo sa iya, nag-overshoot sa pihak nga lane kun sa diin ginsugata sini ang isa ka Ceres bus nga naggikan sa Bacolod City padulong sa Cadiz City proper.
Bangud sa mabaskog nga impact, naglabog ang tatlo ka sakay sang motorsiklo sa sementado nga kalsada kag nakaangkon sang head injuries nga nagresulta sa ila nga kamatayon.
Sa pihak nga bahin, ang driver sang Ceres bus ang boluntaryo nga nagsurrender sa mga otoridad kag sa karon, yara ini sa detention facility sang Cadiz City Police Station.
Suno kay Loreno, naka-istoryahanay na ang pamilya sang mga biktima kag ang driver kag nag-ugyon nga mag-areglohanay.
Pahayag ni Loreno, gikan ang tatlo ka biktima sa kampo kun diin sila ga-ubra, kag nahibaluan nga nag-inom sila sang makahulubog nga ilimnon matapos makabaton sang sweldo.
