Tatlo ka mga miyembro sang New People’s Army ang naaresto sang mga miyembro sang Philippine Army sang ginserbehan sang warrant of arrest ang ginaalegar mataas nga opisyal sang hublag sa Barangay Su-ay, Himamaylan City, Negros Occidental.
Suno kay Brigadier General Inocencio Pasaporte, commander sang 303rd Infantry Brigade, ang subject sang warrant of arrest amo si Ramon Patriarca, isa ka mataas nga opisyal sang Komiteng Rehiyong Negros.
Siya ang may yara sang napulo ka standing warrant of arrest kag kalabanan diri ang murder.
Ang iban nga arrest warrant suno kay Pasaporte ang gin-issue sang korte sa Tagbilaran City, Bohol.
Natabuan naman nga yara sa lugar ang iban pa nga miyembro sang NPA nga may yara sang armas kag granada nga amo sanday Genevel Carmen kag John Michael Baldonado alyas Ka Alvin nga miyembro sang Central Negros 1.
Nakuha sa ila paghinakop ang isa ka hand grenade, KG9 machine gun nga may magazine, AK47 nga may mga bala kay subersibo nga dokyumento.
Sa karon, sila ang nakahunong sa Himamaylan City Police Station.
Kadungan sini, nagpanawagan si Pasaporte sa mga rebelde nga hingalitan na ang kahigayunan nga ginatanyag sang gobyerno ang E-CLIP ukon Enhanced Comprehensive Local Integration Program.
