Patay ang tatlo ka mga miyembro sang New People’s Army sa nagluntad nga engkwentro sa tunga nila sang tropa sang gobyerno sa Sitio Namunduan, Barangay Camudlas banwa sang Bindoy sa Negros Oriental kahapon sang hapon.
Sa interview sang Bombo Radyo Bacolod kay 303rd Infantry Brigade commander Col. Inocencio Pasaporte, ginpahayag sini nagapatigayon sang security patrol ang katapo sang 94th Infantry Batallion kag miyembro sang Bindoy Municipal Police Station sa lugar bangud sa nagapadayon nga tagtaganay sang cash assisstance sa idalom sang Social Amelioration Program.
Nakabaton ang mga ini sang report nga may yara sang presensya sang armado nga grupo sa lugar.
Gilayon naman ini nga ginkadtuan sang tropa sang gobyerno apang hinali nalang nga nagluntad ang engkwentro sa tunga sang duha ka grupo.
Sa inisyal nga impormasyon, napilasan ang isa ka tropa sang militar kag isa ka sibilyan subong man ang isa ka menor de edad nga nasalabat sang bala samtang tatlo naman ang kumpirmado nga patay sa bahin sang NPA.
Suno kay Pasaporte, padayon pa ang hot pursuit operation sang militar sa mga rebelde nga grupo.
