23 ang Filipino gikan sa 25 ka mga sakay sang Greek-flagged motor tanker Sounion nga gin-atake sang Houthi rebels samtang nagalayag sa Red Sea.
Suno sa UK maritime agency, bangod sa asod-asod nga pag-atake, may nagluntad nga sunog sa barko kag ini ang nadulaan sang kuryente.
Madumduman nga humalin sang Nobyembre ang Houthi militants nga suportado sang Iran ang naga-atake sang mga international shipping malapit sa Yemen bilang suporta sa Palestinians karun nga padayun ang gyera sa tunga sang Israel kag Hamas.
Apang sa karun, wala pa gin-ako sang Hamas nga sila ang may kahimuan sang bag-o nga pag-atake.
Gin-atake sang mga sakay sang duha ka bangka ang nag-atake sa Sounion, kun sa diin ini ang gin-igo sang multiple projectiles samtang nagalayag 77 nautical miles sa nakatungdan sang port city nga Hodeidah sa Yemen.
May-ara pa sang pagbayluhanay sang lupok sa nasambitan nga insidente, kag sa ikaduha nga hugnat sang pag-atake didto na gindakop sang kalayo ang barko kag nadulaan sang engine power.
Wala naman sang reported nga nasamaran gikan sa 25 ka mga crew nga ginalakipan sang duha ka Russians kag 23 ka Filipino.
Ginpasalig sang operator sang barko nga Delta Tankers nga padayun pa nga nagalayag ang barko nga nag-angkon sang minor damage, samtang ginatsekyar pa kung sila ang magapadayun sa ila nga byahe.
Kalakip sa mga Filipino crew ang duha ka residente sang Manapla kag isa sa Calatrava, Negros Occidental; duha sa Iloilo City; isa sa Patnongon, Antique; isa sa Bugasong, Antique; isa sa Ubay, Bohol; isa sa Samar; isa sa Cebu City; isa sa Talisay City, Cebu; isa sa Kanangga kag isa sa Hilongos, Leyte; duha sa Davao City; isa sa Parañaque City; isa sa Lucban, Quezon; isa sa San Juan, Batangas; isa sa San Carlos City, Pangasinan; isa sa Muntinlupa; isa sa Malaybalay, Bukidnon; kag isa sa Jones, Isabela.
