Ginabanta tatlo ka balay ang ginlamon sang kalayo sa Efegenio St, Southville, Barangay 39, Bacolod City.
Pahayag sang ginkilala kay Charles, tag-iya sa isa sa mga nasunog nga balay, nga yara ini sa babaw sang ila balay kag nakibot nalang sang nag-ibwal ang kalayo.
Suno diri, ang sunog ang nag-umpisa sa kaingod nga balay sa likod nga bahin sang ila puluy-an.
Anom ang mga ini sa ila puluy-an nga nahimo man nga makagwa dala ang pila ka mga dokumento, personal nga gamit, wallet kag ang personal computer nga gamit ni Charles sa home-based nga trabaho.
Pahayag sini nga pila palang ka bulan sang ila ginpakay-o ang balay.
Ginapakamaayo naman sini nga wala sang nasamaran sa ila pamilya bangod sa sunog.
Samtang ginpahayag naman sang isa pa ka residente sa lugar nga ginkilala kay Jonathan, ginpahayag sini nga mahimo nagikan sa balay sang ginkilala kay Jake ang sunog.
Paathag sini nga ginatambakan sang karton ang balay ni Jake kag samtang ini ang nagatig-ang gindakop sang kalayo ang mga karton nga nagtuga sang pagdako sang kalayo.
Nakaangkon naman sang kabudlayan ang mga bombero ilabi na nga kitid ang lugar kag naga-inikit ikit naman ang mga pamalay.
