Ginkumpirmar sang Department of Health (DOH) nga may tatlo na naman ka panibag-o nga kaso sang polio sa Pilipinas.
Sa statement sang DOH, gintumod sini ang tatlo ka bag-o nga polio cases nga ginalakipan sang duha katuig nga bata gikan sa Maguindanao, isa katuig nga lalaki gikan sa Cotabato City kag apat katuig man nga babaye sa North Cotabato.
Suno sa DOH, ginpadala ang samples sang mga pasyente sa Research Institute for Tropical Medicine kag National Institute of Infectious Diseases sa Japan, kun sa diin nagpositibo ini sa polio.
Nahisayran nga nabakunahan ang duha katuig nga babaye kag isa katuig nga lalaki samtang ang apat katuig nga babaye, indi kumpleto nga doses sang bakuna ang nabaton sini.
Pareho nga gin-admit ang tatlo sa Cotabato Regional Medical Center.
Madumduman nga sang Setyembre sang ginkumpirmar sang DOH ang liwat nga pagbalik sang polio sa Pilipinas matapos ang 19 katuig nga gindeklarar sang World Health Organization nga polio-free ang pungsod.
Sang Setyembre narekord ang una nga kaso sang polio sa Lanao del Sur nga ginsundan sa Laguna kag Maguindanao.
