May nagpalapit na sa Bacolod Police Station 2 nga luyag kilalahon ang bangkay sang lalaki nga nasapwan nga natabunan sang sako sa sea wall sa BredCo Port sa Brgy. 2 ciudad sang Bacolod, nga nasapwan sang Nobyembre 12 sang gab-i.
Sa interview sang Bombo Radyo Bacolod kay Police Major Eugene Tolentino, commander sang Police Station 2, tatlo ka persona ang nagpalapit sa ila nga estasyon kag sila ang naggikan sa Brgy Sum-ag, Bacolod City, Silay City, kag Calatrava Municipality, apang lunsay negatibo nga kakilala nila ang biktima.
Iban sa ginbasehan amo ang panglawason kag mga marka sa lawas sang biktima.
Madumduman nga nasapwan ang bangkay sang isa ka lalaki nga nakagapos ang tiil kag kamot, nakahigot sa sako kag daw kaangay nga ginpilpilan sang bato agud nga indi maanod.
Ini ang nakashort nga itom samtang ang sando sini ang nakahigot sa iya kamot.
Sa karun padayon sa gihapon ang imbestigasyon sang kapulisan kag wala untat ang ila panawagan sa kun sin-o man ang may namissing nga himata nga mahimo lamang magpalapit sa ila.
