Nagpagwa na sang official statement ang tatlo sa apat ka mga tawo nga nakasulat ang ila ngalan sa listahan nga nakita upod sa duha ka utod nga tiil nga nasapwan sa CL Montelibano Avenue, Barangay Villamonte syudad sang Bacolod.
Santo sa statement ni Atty. Rafael Ocampo, sa gina-aligar nga fuel smuggling, bangud wala man sang klaro nga aligasyon, ginalantaw sini nga ini ang naangot sa fuel smuggling.
Suno pa sa statement, siya ang operator sang nasambit nga gas station kag isa pa ka gas station sa Gatuslao St. apang tubtob lang sang August 31, 2022.
Sang September 2022, ginbalik na sini ang mga gas stations sa dealer.
Suno pa sa statement sang ini pa ang nagaoperate sa gas station, nagakuha lamang ini sang fuel sa mga brand depot.
Nagapati man ini nga nasal-an sang mga nagbilin sang tiil nga siya sa gihapon ang nagapanag-iya sang nasambit nga gas station.
Ginpahayag man sa statement nga siya ang practicing lawyer kag indi na sini kinahanglan nga magsmuggle sang fuel agud mangin palangitan-an.
Ginpasiguro man sini sa mga otoridad ang full cooperation halin sa iya.
Samtang, santo naman sa statement ni Agnus Botones, indi siya imbulbado sa fuel supply kag sa operation sang CL Montelibano gas station.
Suno sa statement, indi siya makasmuggle sang fuel bangud ini man siya fuel importer.
Ginatugyan aman sini sa mga otoridad ang pag-imbestigar sa insidente.
Sa ginpagwa nga statement ni Mark Efren, ginpahayag sini nga ang Root Petroleum Incorporated kun sa diin ini konektado ang isa ka accredited hauler kag ginabayaran lamang sang hauling ukon service fees.
Gin-athag man sini nga ang Root Petroleum ang wala nagabaligya sang langis sa bisan diin nga gasolinahan.
Sa pihak nga bahin, ginpahayag sang station commander sang Bacolod Police Station 2 nga plano nila nga magarequest sang crossmatching sa DNA agud nga mahibaluan kun ang utod nga kamot sa Barangay 2 kag utod nga tiil sa Barangay Villamonte ang magamatch.
Suno kay Police Capt. Jonito Pastrana, lain man ang motibo nga sang utod nga kamot sa Barangay 2 bangud ini ang illegal nga druga kag maathag gid ini apang ang sa utod nga tiil ang mahimo negosyo ang motibo bangud smuggler naman ang nakabutang sa listahan sang mga pangalan.
Ginalantaw man sini nga nga ang kamot nga gin-utod ang mahimo halin sa punerarya kag ini ang gingamit lang agud nga ipahog sa mga illegal drug users.
Suno kay Pastrana ang DNA lang ang makasabat kun ang utod nga tiil kag kamot ang magamatch.
