May persons of interest na ang Silay City Police Station sa riding in tandem nga nagpangluthang sa tatlo ka persona sa Sitio Beranio, Brgy Lantad, Silay City, kapin alas-5:30 kahapon sang hapon.
Sa interview sang Bombo Radyo Bacolod kay Police Lt Col. Mark Anthony Darroca, hepe sang Silay City Police Station, naesturya nila ang paryente sang isa sa suspek kag nahibaluan nga nagpadulong didto ang duha nga kaangay nga nagasala-sala.
Naghambal ang isa ka suspek sa iya paryente nga may 20 ka tawo nga nagalagas sa iya kag luyag siya nga patyon kag ginaprotektahan niya man ang iya abyan.
Naglakat ang duha sakay ang motorsiklo kag nalabyan nila sang isa ka tawo nga nagapungko kag ila ini gintiro.
Nagderetso ang duha padulong sa national highway kun sa diin may isa pa gid sila ka gintiro kag sang naka-exit na sila sa area padulong sa norte nga bahin may yara sila sang naagyan nga motorista nga ila man gintiro.
Suno kay Darroca, indi related sa isa kag isa ang tatlo ka biktima kag indi man nila kilala ang mga suspek.
Natigayon naman nga nakilal-an ang mga suspek bangod wala sila sang suksuk nga mga helmet.
