Ginahulat nalang sang mga kapulisan sang Bacolod City Police Station 3 nga makagwa sa ospital ang biktima nga ginluthang sa Purok Langis, Brgy Banago, ciudad sang Bacolod sang Enero 3 sang gab-i agud nga mapasakaan sang kaso ang suspetsado.
Ang biktima ang ginkilala nga si alyas “Lovely”, 30 anyos kag residente sang Brgy Bata, Bacolod City apang temporaryo nga nagapuyo sa Brgy Banago, Bacolod City.
Sa interview sang Bombo Radyo Bacolod kay Police Captain Rondyl Tapang, station commander sang Bacolod Police Station 3, nagapasalamat sila nga may yara sila sang nakita nga cctv footage kun sa diin nakita ang tatlo ka persona nga suspetsado sa pagtiro sa biktima.
Natumod man ini ni alyas Lovely gani ginahulat nalang nga makagwa ang biktima agud nga mapasakaan sang kaso ang suspetsado.
Madumduman nga kaupod ni Lovely ang nobyo sini sang may nagpalapit nga mga lalaki.
Gilayon nga gintiro sang isa ka lalaki si Lovely kag nalagyo kaupod ang duha sini ka mga kaupdanan.
Nag-agom sang igo si Lovely sa dughan kag paa sini.
Suno kay Tapang, posible nga ginsuspetsuhan nga asset sang gobyerno ang biktima samtang posible man nga wala ini nakaremit sa pagbaligya sang illegal nga druga.
