Masobra P1.3 million nga balor sang suspected shabu ang nakumpiskar sa tatlo ka persona kalakip ang isa ka minor sa drug buybust operation nga ginpatigayon sa Purok 1, Barangay Nayon sa banwa sang San Enrique, Negros Occidental.
Ang mga suspect ang ginalakipan nanday Johnel Grandflor alias Tol, 42 anyos, kasado, tumandok sang Purok Pagsilak, Barangay Atipuluan, Bago City; Bella Acotanza, 22 anyos, babayi, single kag ang 16 anyos nga dalagita, lunsay residente sang Zone 2, Barangay Tabao sa banwa sang Valladolid.
Ang operasyon ang ginpatigayon sang Regional Police Drug Enforcement Unit 6 alas-2:59 kahapon sang hapon.
Narecover ang anom ka knot tied ukon bugkos sang plastic bags nga naga-unod sang suspected shabu kag lima ka sachet sang suspected shabu gikan kay Grandflor samtang nakuhaan naman sang tag-isa ka sachet ang duha ka babayi.
Ang kabug-usan nga recoveries ang nagabug-at sang 205 grams kag may standard drug price nga P1,394,000.
