Ginpahayag sang hepe sang Bacolod Police Station 3 nga positibo nga nakilala sang mag-asawa nga biktima sang motornapping, ang tatlo ka suspetsado nga nagtaban sang ila motorsiklo sa Dalan Lacson, Barangay Mandalagan, Bacolod City sang Huwebes, alas 4:30 sang kaagahon.
Suno kay Jessabel Sinogbuhan, kaupod sini ang iya bana nga nagbiyahe nagikan sa Sagay City agud magkuha kuntani sang lapida sa Dalan Lacson.
Samtang nagahulat ang mga ini nga magbukas ang establishmento, nanaog sila sa motorsiklo kag nagpungko sa higad.
Nabilin naman ang yabi nga nakaangot sa motorsiklo.
Suno kay Sinogbuhan, may naglabay nga tatlo ka mga lalaki nagikan sa sur nga bahin kag hinali lamang nga ginsakyan ang motorsiklo sang bana sini kag gintayaan sila sang armas-luthang.
Nagtuyo pa nga magbato ang iya bana apang nagpalupok ang isa sa mga suspetsado kag nagmaneho padulong sa norte.
Sa interview sang Bombo Radyo kay Police Captain Rondyl Tapang, hepe sang Bacolod Police Station 3, ila gin-akomodaar ang mag-asawa kag santo sa impormasyon nga ginhatag sang mga ini, na-identify ang mga suspek.
Suno diri, sila nag-conduct sang operations sa mga posible nga hideouts sang mga suspetsado kag nakakuha sila nga impormasyon nga yara sa ciudad sang Victorias ang isa sa mga suspetsado.
Naaresto ang isa sa mga suspetsado nga ginabanta naga-edad sang masobra 30 anyos kag ini ang makaagi na preso sadtong tuig 2005 bangod sa kaso nga pagpatay.
