Tatlo sa mga traffic enforcers sa Bacolod City ang indi na makarenew sang kontrata subong nga Enero matapos mapamatud-an sa pagpangilkil.
Sa interview sang Bombo Radyo Bacolod kay Bacolod Traffic Authority Office deputy head Jose Antonio “Jojo” Robello, ang isa ang ginrecommend for removal anom ka bulan na ang nakaligad samtang ang duha ang sang nakaligad lamang nga Disyembre 2024.
Suno diri, madamo sila sang reklamo nga nagakabatun batok sa mga traffic enforcers apang ini ang ginapaidalom pa sa imbestigasyon antes madesisyonan.
Ang reklamo sa duha sini nga Disyembre ang nagikan sa mga eskwelahan kag simbahan, nga gina-alegar ginapangayuan sang mga traffic enforcers.
Ang mga ginrekomendar for removal ang lima tubtob napulo ka tuig na nga traffic enforcers sa ciudad humalin pa sa nakaligad nga administrasyon.
Paathag ni Robello nga may appointment ang pagtrabaho sang mga job order employees gani sila sa BTAO ang tubtob lamang sa rekomendasyon kag indi basta-basta makapahalin sang personnel.
Ang tatlo ang kilala naman ukon notorious na sa extortion activities.
Agud maseguro ang legitimacy sang reklamo, sila ang nag-interview sa mga kaupdanan nga traffic enforces kag sa mga nagabulig sa pagmanage sang trapiko, kag sa tion nga makakita sang bastante nga ebidensya ang mga ini ang ginarecommend for remmoval.
Panindugan ni Robello nga wala nila ginatolerar ang kaangay nga aktibidad bangod ginatinguhaan nila nga mabalik ang pagsalig sang mga pumuluyo sa BTAO.
Pasalig sini nga ginahimo nila ang best nga mamanage ang trapiko sa Bacolod City.
Sa karun, may 254 ka personnel ang BTAO, nga ginalakipan 50 nga may plantilla ukon regular employees kag 204 nga JOs.
Samtang 70 naman ang mga non-traffic enforcers, gani 184 lamang ang kabug-usan nga traffic personnel.
