Patay ang isa ka tatlo ka tuig nga bata nga babaye matapos nalumos sa swimming pool sang isa ka resort sa Barangay Himaya, Hinigaran, Negros Occidental.
Sa interview sang Bombo Radyo kay Police Captain Ryan Villasario, hepe sang Hinigaran Municipal Police Station, ginpahibalo sila sang personnel sang medical clinic sa banwa nga may nalumos nga tatlo ka tuig sa swimming pool sang isa ka resort.
Suno kay Villasario, yara sa kiddie pool nagapaligo ang tatlo ka tuig nga bata nga babaye kag ginabantayan ini sang iya amay nga si Ramy Pedro sang nagpadulong kadali sa banyo ang amay.
Pagbalik sini, nasapwan na lamang niya ang tatlo ka tuig sini nga bata nga nagalutaw sa swimming pool para sa mga dalagko.
Wala na natabangan ang bata kag nadulaan gid sang kabuhi.
