Wala na natabangan ang tatlo ka tuig nga bata nga lalaki matapos nalumos sa dako nga balde sa sulod sang ila banyo sa Hacienda Rosario Sur, Barangay Granada, Bacolod City kahapon sang udto.
Sa interview sang Bombo Radyo kay Police Captain Francis Depasucat, station commander sang Bacolod Police Station 5, natulugan ang amay kag sang siya ang nagakabugtaw, natingala ini kun ngaa wala na ang iya bata.
Ginapangita sang amay ang iya tatlo ka tuig nga bata apang nasapwan na lamang ini nga wala na sang kabuhi sa sulod sang tab ukon dako nga balde nga ginasudlan sang tubig sa ila banyo.
Ginhingagaw pa ini dala sa ospital apang wala na natabangan.
Suno kay Depasucat, subong gid lamang nga adlaw nareport sa ila estasyon ang nasambit nga insidente bangud yara sa ospital ang mga ginikanan sang biktima.
Sa ila imbestigasyon, wala sang foul play nga natabo.
