Masobra P4 million nga balor sang suspected shabu ang nakumpiskar sa tatlo ka mga persona nga tumandok sa Iligan City, Lanao del Norte alas-7:40 kaina sang aga sa Hacienda San Lucas, Barangay Hilamonan, Kabankalan City.
Ang tatlo ka mga naaresto ang ginalakipan sang isa ka babayi kag duha ka lalaki nga ginkilala nga sanday Lykey Vina, 38 anyos, lalaki, single, naga-buy and sell sang motorsiklo; Hamid Sanggacala, 19 anyos, lalaki, single, estudyante; kag si Cherry Tuazon, 34 anyos, babayi, single, wala sang trabaho, lunsay mga residente sa Barangay Sta. Elena, Iligan City, Lanao del Norte.
Sa interview sang Bombo Radyo Bacolod kay Police Lt. Col. Roberto Indiape, hepe sa Kabankalan City Police Station, ang operasyon ang ginpangunahan sang Philippine National Police (PNP) Drug Enforcement Group sang Special Operations Unit 6.
Pahayag sini nga nakabatun siya sang tawag nga may patigayunon nga iligal nga transaksyon sa Kabankalan City gani gilayon man sila nga nagkooperar.
Ang mga supsadto ang nakasakay sa isa ka gin-arekilahan nga kotse nga ginalantaw nga nagikan sa Bacolod City, kag mahimo nagdagdag lamang sang supply kag magaderetso sa Negros Oriental.
Narecover gikan sa mga ini ang anom tanan ka big knot tied transparent plastic sachet sang suspected shabu kalakip na ang buybust item kag iban pa nga non-drug items.
Ang suspected shabu ang ginabanta nagabug-at sang 600 grams kag may standard drug price nga P4,080,000.
Wala naman sang record sa Kabankalan City Police Station ang mga suspetsado, apang wala pa matumod ang assessment sang PDEG nga amo ang nagamonitor sa ila hulag.
Bangod tatlo ang nagkaladakpan nga magkaupod sa illegal nga transaksyon, nagapati si Indiape nga may grupo ang tatlo, apang wala pa matumod kun sa diin nga drug groups ang mga ini nalakip.
Ang mga suspetado ang nakahunong na sa kustodiya sang Kabankalan City Police Station samtang gindala naman sa crime laboratory ang mga suspected shabu para sa examination.
