Nalakip ang tatlo ka tuig nga bata nga lalaki kag napulo ka tuig nga bata nga babayi sa 25 ka mga kaso sang coronavirus disease nga nagdugang sa ciudad sang Bacolod kahapon samtang isa naman sa Negros Occidental.
Sa COVID-19 Case Bulletin No. 125 nga ginpagwa sang Department of Health Region 6 kahapon, isa sa mga taga Bacolod ang locally stranded individual (LSI) samtang 24 naman ang indigenous cases.
12 diri ang nakafacility quarantine, siyam ang nakahome quarantine samtang may apat nga admitted.
Ang dugang nga nagpositibo naman sa probinsya ang isa ka 39 anyos nga babaye nagikan sa Bago City.
Nakahome quarantine ang nasambit nga pasyente.
Nadugangan naman sang isa ang numero sang mga nakarecover sa ciudad samtang 12 naman sa probinsya.
Sa karun, may yara na sang 416 ka kompirmado nga mga kaso sang COVID-19 sa Negros Occidental samtang 177 naman sa ciudad sang Bacolod.
Kahapon, isa ka 67-anyos nga babayi nga residente sang Barangay 2 nga nagtaliwan sa Corazon Locsin Montelibano Memorial Regional Hospital bangud sa pneumonia ang nagpositibo sa COVID.
