Duha tanan ka mga kalabera ang nasapwan sa kampo nga sakop sang Hacienda Garcia, Barangay Alangilan sa ciudad sang Bacolod, sa magkatuhay nga oras sang Miyerkules, Enero 8, 2025.
Sa interview sang Bombo Radyo Bacolod kay Police Captain Portia Nillosan, station commander sang Bacolod City Police Station 5, suno sa imbestigador sang police station 5 nga ang una nga nasapwan ang isa ka babayi nga may pustiso apang ang makakumpirmar lamang sang identity ang forensic unit.
Suno kay Nillosan, may yara naman sang nasapwan alas 2:45 ang takna sang hapon nga ginapatihan kalabera sang isa ka lalaki nga ginlubong apang sa manabaw lamang nga bahin sang kampo sang tubo.
Ang kalayuon sini gikan sa una nga nasapwan nga kalabera ang yara lamang sa 50 metros.
Samtang ang kalabera naman nga nasapwan sadtong Nobyembre 2024 ang may kalayuon nga 150 metros gikan sa lugar kun sa diin nasapwan ang ginapatihan kalabera sang babayi.
Ang nakakita sang ginapatihan nga kalabera sang lalaki ang pareho man nga mga manugtapas sang tubo nga una nakasapo sang kalabera sang ginapahayag babayi.
Suno kay Nillosan ang mga tul an ang ipadala sa forensic unit agud nga maexamine kag matumod ang identity apang mas maayo kun may claimant para matumod paagi sa DNA.
Dako naman ang pagpati ni Trisha Antiquera nga himata sini ang nakita nga kalabera.
Suno kay Trisha, nagakabatyagan na sini nga ang mga kalabera ang iya himata ilabi na sang ginpahayag nga may pustiso ang una nga nasapwan kahapon sang aga.
Suno diri, nagapati ini nga iya himata ang nasapwan bangud sa pustiso kag sa distansya kun sa diin ang mga ini nasapwan.
