Patay ang tatlo samtang 15 ang pilason nga mga pasahero sa nagluntad nga aksidente sa banwa sang Jimalalud, Negros Oriental sang March 18 sang gab-i.
Sa report sang Negros Oriental Police Provincial Office, ginamaneho ni Marcos Alberastinni, 40 anyos sang ciudad sang Guihulngan ang isa ka cargo truck sang nakabunggo ini sa van nga nagadu-ag sang puti nga ginamaneho naman ni Jony Gacang Larano, 33 anyos, residente sang ciudad sang Bacolod.
Padulong sa separado nga direksyon ang van sakay ang kapin 25 ka mga indibidwal nga lunsay magparentehanay.
Gindala ang driver sang van kag ang 15 ka iban pa sa ospital nga lunsay nakaangkon sang minor injuries.
Napatay naman sa ospital ang tatlo ka mga sakay sang van nga sanday Erodetha Gacang, 67 anyos; Roel Gacang, 62 anyos kag Eliza Pontillano, 68 anyos.
Nagtinguha pa nga magpalagyo ang driver sang cargo truck apang nadakpan man ini matapus ginpatigayon ang hot pursuit operation.Naka-detain na si Alberastinni kag magapangatubang sang kaso nga reckless imprudence resulting in multiple homicide, multiple physical injuries, and damage to properties.
