Patay ang tatlo ka indibidwal nga sakay sa duha ka motorsiklo matapos gin-arado sang ten-wheeler truck sa Bgy Tooy, ciudad sang Himamaylan, kaina pasado alas- 6:00 sang aga.
Ang mga biktima ang ginkilala nga sanday Jinuard Lirazan, 40 anyos kag Cesar Lirazan, 23 anyos, residente sang Sitio May-ang, Barangay Tagukon, Kabankalan City kag angkasanay sa isa ka motorsiklo; kag Danny Delalinia residente naman sang Sitio Taypon, Barangay Carol-an, Kabankalan City samtang ang drayber naman sang truck amo si Benjie Agoilo, 48 anyos, residente sang Brgy Maytubig, Isabela.
Sa interview sang Bombo Radyo kay PLt Col Anthony Grande, hepe sang Himamaylan City Police Station, wala sang karga ang truck nga nagabyahe halin sa banwa sang Binalbagan padulong sa ciudad sang Kabankalan samtang ang duha naman ka motorsiklo ang nagabyahe padulong sa norte nga bahin.
Suno diri, nag-ako ang drayber sang truck nga naglapaw ini sa lane kag amo nga naarado ang duha ka motorsiklo.
Ginhingagaw man sini preno ang truck apang wala na nahingagaw nga malikawan ang mga biktima.
Una nga gindala sa ospital ang duha ka biktima apang nadugayan sa pagkuha sa isa ka biktima nga nagsulod sa idalum sang truck.
Pag-abot sa ospital gindeklarar nga dead on arrival ang tatlo, samtang ang drayber sang truck ang nagsurrender man sa kapulisan.
