Patay ang tatlo ka mga lalaki matapos makabunggo sa truck sa Crossing Cabanyohan, Barangay Tampalon, Kabankalan City, Negros Occidental, alas- 9:40 sang gab-i, kagab-i.
Sa interview sang Bombo Radyo Bacolod kay Police Captain Sammy Gasataya, deputy chief of police sang Kabankalan City Police Station, nagabyahe sakay sa motorsiklo ang tatlo ka mga napatay kun sa diin ang drayber amo si Rico Ian Samanero, 26 anyos, samtang ang angkas naman sini sanday Robin Causapin, 19 anyos kag Jomel Hamaybay, 21 anyos nga lunsay mag residente sa nasambit nga brgy.
Suno diri, yara sa impluwensya sang makahulubog nga ilimnon ang tatlo samtang nagabyahe papauli kun sa diin dulhogon ang dalan samtang sugata naman sini ang isa ka truck nga nagabyahe pataklad nga ginamaneho ni Gerardo Makilan, 40 anyos, residente sang Purok 2, Brgy Locotan, Kabankalan City.
Nabunggo ang motorsiklo sa truck kag ginhingagaw ang tatlo dala sa ospital un sa diin gindeklarar nga dead on arrival sanday Samanero kag Hamaybay samtang wala lang nagdugay sa ospital si Causapin kag siya ang nadulaan man sang kabuhi.
