Tatlo ang patay kag siyam ang pilason sa tatlo man ka separado nga aksidente sa dalan nga ngaluntad sa ciudad sang Bago kagab-i.
Alas-6:20 kagab-i, nagluntad ang una nga aksidente sa national highway sa Purok Rosas, Barangay Calumangan, Bago City.
Suno kay Police Staff Sgt. Ronald Javier, traffic investigator sang Bago City Police Station, nagamaneho sang motorsiklo si Philmark Francisco, 39-anyos, kasado kag residente sang Purok Mainuswagon, Barangay Sagua Banwa, Valladolid, Negros Occidental.
Halin si Francisco sa sur nga direksyon kag padulong sa norte sang nakabunggo sa Mitsubishi Strada nga nagikan sa norte nga direkyson padulong sa sur kag ginamaneho ni Cargie Saliba, 35 anyos, residente sang Purok Masinulundon, Brgy. Punta Taytay, Bacolod City.
Matapos ang pagbungguanay, nagdiretso sa pihak nga lane sang dalan si Francisco kag nagbunggo pa gid sa isa ka motorsiklo nga ginamaneho ni Charlie Estampa kag nagabyahe nagikan sa norte padulong sa sur nga direksyon.
Bangud sa impact, napatay si Francisco samtang pilason naman si Estampa nga residente sang Prk. Mainuswagon, Brgy. Sagwa Banwa, Valladolid, Neg. Occ kag ang backrider sini nga si Raxel Bergante, 39 years old kag residente sang Brgy. Ilang-Ilang, Bacolod City.
Napilasan man ang sakay sa Strada nga sanday Precious Grace Saliba,33 years old; Jona May Malana, 24 years old; kag duha ka mga bata ni Saliba nga lunsay pa menor de edad nga lunsay mga residente sang Prk. Masinulundon, Brgy. Punta TayTay, Bacolod City.
Alas-6:40 kagab-i, isa pa gid ka aksidente ang nagluntad sa national highway sa Prk. Rosas, Brgy. Calumangan, Bago City kun sa diin imbolbado ang isa ka ambulansya nga magaresponde kuntani sa nauna nga aksidente.
Suno kay Police Staff Sgt. Ronald Javier, nagpundo ang Isuzu truck nga ginamaneho ni Rolly Luang kag nagakarga sang tubo bangud sa nauna nga aksidente.
Nagbunggo sa likod sini ang ambulansya sang ciudad nga ginamaneho ni Ranel Dumaraog bangud nadulaan ini sang kontrol sa salakyan.
Bangud sini, nag-agom sang injuries sanday Rolly Luang, 47 years old, residente sang Prk. Lukdo, Brgy. 1A, Manapla; kag ang mga emergency responders nga sanday Marriam Tydings Dormido, 34 years old, residente sang Prk. Palayan, Brgy. Sampinit, Bago City; Carl Jorany Lirazan, 32 years old, residente sang Prk. Green Shell, Brgy. Canmoros, Binalbagan, Negros Occidental; kag Remar Jamias, 29 years old, kag residente sang Prk. Pili, Brgy. Mailum, Bago City.
Ang mga pilason ang gindala sa Bago City Hospital para sa medical treatment samtang naguba naman ang ambulansya nga ginamanehi ni Ranel Dumaraog, 55 years old, kag residente sang Prk. Mainuswagon 2, Brgy. Lag-asan, Bago City.
Alas-10:40 kagab-i, may naaksidente pa gid sa national highway san Prk. Proper South, Brgy. Taloc, Bago City.
Suno kay Police Staff Sgt. Ronald Javier, ang Honda City nga ginamaneho ni Jessie Delagado Jr., residente sang Sitio Biante, Recreo, Pontevedra.
Ang sedan ang nagikan sa sur padulong sa norte nga direksyon sang ini ang naglapaw sa kurbadahon nga dalan kag nagbunggo sa concrete barrier sa tabok sang dalan.
Nagdiretso pa gid ang awto sa semento nga kanal antes nagbaliskad.
Bangud sang kabaskugon sang impact, ginbawian sang kabuhi ang driver nga si Jessie Delagado kag ang iya kaupod nga si Jayson Pagcaliwagan nga residente sang Kumintang Ilaya Batangas.
Pilason naman si Geraldine Gamus, residente sang Brgy. Bayanan, San Pascual, Batangas.
