Tatlo patay, tatlo padayon nga ginabulong sa ospital matapos nga maigo sang kilat sa Hacienda Manolo, Barangay Don Salvador Benedicto, Pontevedra, Negros Occidental, alas 6:00 sang gab-i, Oktubre 31.
Ginkilala ang napatay nga sanday Dennis Moscoso, 44 anyos, single, kag residente sang Barangay Batuan, San Enrique; Marcelino Sibugan, 35 anyos kag residente sang Barangay General Malvar, Pontevedra kag Felimon Genova, 60 anyos, kasado kag residente sang Barangay 2, Pontevedra.
Sa interview sang Bombo Radyo Bacolod kay Police Master Sergeant Chester Silda, Investigator on Case sang Pontevedra Municipal Police Station, ang mga biktima ang nagpangani sang humay apang nagpasilong sa isa ka kamalig bangud nag-ulan nga may pagpangilat.
Suno kay Silda, samtang nagapasilong ang mga ini nakibot sila nga sa ila nahamtangan nag-igo ang kilat.
Bangud sa impact, napatay ang tatlo samtang ang tatlo ang nagapabilin sa ospital sa ciudad sang Bacolod para sa dugang nga pagbulong.
Ang duha sa tatlo ka mga nasamaran ang stable na ang kondisyon apang ang isa ginahibalo pa ang latest medical bulletin.
Suno sa investigator on case, indi lang ini ang una nga kahigayunan nga may naigo sang kilat sa lugar bangud sa nagliligad nga tuig may yara man.
