Pilason ang tatlo ka mga persona matapos nga magpalupok sang sulpak ang isa ka hubog nga tricycle driver sa Sitio Tap-ok, Barangay Enclaro, banwa sang Binalbagan, Negros Occidental, kahapon sang aga.
Ginkilala ang mga napilasan nga sanday Analyn Tambongan, 51-anyos, Arlene Guarin, 47 anyos kag Cyrus Tambungan, 53-anyos, lunsay mga residente sang nasambit nga lugar.
Samtang, ginkilala naman ang suspek nga si Rolin Estrella, 41-anyos, wala sang asawa kag isa ka traysikol driver.
Sa interview sang Bombo Radyo Bacolod kay Police Major Randy Babor, hepe sang Binalbagan Municipal Police Station, fiesta sa nasambit nga Sitio sang Miyerkules gani yara sa impluwensya sang makahulubog nga ilimnon ang suspek kag nakalabay sa mga nagainum nga mga sunoy sa tupad nila balay kag nagpangayo sang ilimnon apang wala ini ginhatagan.
Suno kay Babor, ginsunlog pa sang mga sunoy ang suspek kag bangud tuman naman ini kahubog, nagpangakig ini kag ginkuha ang sulpak kag ginpalupok.
Bangud sini, aksidente nga na-igo ang tatlo ka mga persona nga yara sa lugar.
Napilasan ang mga ini kag gindala sa Binalbagan Infirmary samtang nagpalagyo naman ang suspek matapos ang insidente.
Narekober sa crime scene ang duha ka live ammunition kag isa ka basiyo sang bala sang 12 gauge shotgun.
Ginpahayag man ni Babor nga ang bala ang indi para sa tawo ukon ang ginatawag nga birds eye gani wala man nakaangkon sang patal nga pilas ang mga nasamaran sang pagpalupok sini sang sulpak.
Padayon naman ang hot pursuit operation sang kapulisan batok sa suspek bangud indi na ini makita sa ila lugar matapos ang insidente.
Suno kay Babor, indi naman kuntani magpagamo ang mga biktima kun magsungka lamang ang suspek kag bayaran ang mga gingasto nila sa pagpabulong sa naangkon nga pilas.
