(Updated) BACOLOD CITY – Nagsungka na ang apat ka mga nagpalagyo nga priso sa custodial facility sang Bacolod Police Station 3 kun sa diin ang isa ang nagsurrender paagi sa bulig sang Bombo Radyo Bacolod kagab-i.
Nahibaluan nga una nga nagsungka si Ely Lorence Sazon, 20-anyos sang Purok Mahimulaton, Barangay Banago alas-5:30 kahapon sang hapon sa nasambit nga police station.
Nagsungka naman sa opisina sang Criminal Investigation and Detection Group-Negros Occidental si Sunny Capa, 22-anyos sang amo man nga barangay mga alas-7:30 kagab-i.
Gilayon man ini nga ginturn-over sa Police Station 3.
Madumduman nga sanday Sazon kag Capa ang nadakpan sa buybust operation sang kapulisan sadtong Disyembre 21 sa Bangga Subay, Barangay Banago kun sa diin nakuha sa ila paghinakop ang ginasuspetsuhan iligal nga druga nga nagabalor sang P9.1 million.
Samtang, nagsungka naman si Michael Peñoso, 24-anyos sang Purok Sigay, Barangay 2 paagi sa Bombo Radyo Bacolod.
Una nga nagpadulong sa estasyon ang pamilya sini kag nagdangop nga mabuligan si Peñoso nga magsurrender.
Sa pagpasiguro man ni BCPO director Col. Henry Biñas nga wala sang may matabo sa iya, nagsugot si Peñoso nga magsungka kun sa diin ginsugat ini siya sang Bombo Radyo News Team kag gindala sa estasyon kag gilayon nga ginturn-over sa Police Station 3.
Si Peñoso ang may kaso man nga paglapas sa Republic Act 9165 ukon Comprehensive Dangerous Drugs Act of 2002.
Nadakpan ini siya sa buybust operation sadtong Disyembre 1.
Samtang, boluntaryo man nga nagsungka sa intel operative sang BCPO si Jeffrey Elanggos, 38-anyos sang Purok Riverside, Barangay Banago alas 4:00 kaina sang kaagahon.
Ini siya ang may kaso nga paglapas sa Republic Act 7610 ukon Anti -Child Abuse Act.
Madumduman nga ang apat ang nakapaglagyo sa prisuhan matapos nila lagarion ang selda Lunes sang kaagahon.
