Boluntaryo nga nagpatigayon sang libre nga pagpanghatag sang pamahaw ang Tau Gamma Phi Triskelion Grand Fraternity STI – West Negros University Chapter kaangay sang sandwich, juice kag tubig sa mga nagabisita sa Burgos Public Cemetery sang Nobyembre 1 kadungan sa pagselebrar sang Undas 2025.
Sa interview sa Bombo Radyo kay Mark Angelo Sola, Deputy Grand Triskellion, ini nga proyekto ang ginahimo nila kada tuig kabahin sang ila tinutuyo nga makabulig sa komunidad kag maghatag bulig sa mga tawo nga nagabisita kag nagapangamuyo para sa ila mga pinalangga nga minatay.
Ginatuyo man nila nga magpadayon ini kada tuig bilang tradisyon sang pag-alagad kag pagpasalamat.
Suno kay Sola, ang ila gamay nga bulig isa lang ini ka paagi sang paghatag sang pagpalangga sang isigkatawo.
Dugang pa sini masobra 80 ka miyembro sa ila grupo ang kabahin sang pagpanghatag sang mga pamahaw.
Ini nga proyekto ginapatigayon lamang sang Nombyembre 1.
Ang Tau Gamma Phi Triskelion Grand Fraternity STI-WNU Chapter nagalaum nga padayon nila nga mahatag ang serbisyo sa masunod pa nga mga tuig bilang isa ka tradisyon nga nagapakita sang pagbinuligay, pagdumdom, kag pagpakig-angot sa komunidad sa tion sang Undas.
