Wala mapunggan sang presidente sang Samahan ng mga Taxi Association sa Bacolod nga maghibi bangud sa kasubo sang ila sitwasyon sa karun nga nagapangatubang sang krisis.
Sa interview sang Bombo Radyo Bacolod kay Ronald Allan Salgado, sa karun nagabiyahe sila sa alas 6:00 sa aga tubtob alas 10:00 ang takna sa gab-i apang ang ila nga kita sa bilog nga biyahe sa gasolina lamang nagakadto kag halos wala na sila sang mapauli sa ila nga pamilya.
Suno kay Salgado, nagakaresto pa sila sa operator sang taxi nga ginabiyahe nila bangud kun indi sila magparesto wala sila sang mapauli sa ila nga pamilya.
Naghibi ini bangud nga sa sitwasyon karun bisan tinapay waay na ini sang madala pauli sa ila pamilya.
Suno diri ang kulang sa ila nga arkila ang ginalista lang sang operator kag ginatulon nalang nila ang masakit nga tinaga nga mabatian nila bangud nahangpan man nila nga may ginagastuhan man ang mga ini.
Diskarte nila kun kaisa sa tion nga magbiyahe pagwa sa Bacolod nagasukot sila per head agud nga makabawi apang nakadepende sa pasahero kun magpasugot nga may upod.
Dugang pa agud nga makasurvive nagapangita sila sang sideline nga trabaho.
Samtang, aminado man ini nga ang ginapahayag nga P5000 nga ayuda ang kulang.
Nagpanawagan ini sa gobyerno nga mabuligan man sila bangud tuman nagid kabudlay ang ila nga sitwasyon bangud sa kamahalon sang presyo sang gatong.
