Nakilala na ang taxi driver nga naghikap sang paa sang iya nga pasahero nga menor de edad nga babayi kag nakuhaan pa sang video.
Sa impormasyon nga nakuha sang Bombo Radyo, gilayon nga nakilala ang driver nga si Ramon Lumra sang Barangay 26, ciudad sang Bacolod paagi sa bulig man sang iya nga operator.
Suno kay Police Lt. Arlyn Torendon, chief sang Women and Children’s Protection Desk sang Bacolod City Police Office, nagreklamo ang pasahero sang acts of lasciviousness batok sa driver pagkasunod nga adlaw.
Bangud naidentify na ang suspetsado, atubangon nalang sini ang kaso apisar nga siya ang at large sa karon.
Aminado si Torrendon nga may mga tawo gid nga abusado gani dapat nga mangin aware kag mangin security conscious apang may mga inosente nga nagakabiktima.
Nagpanugyan si Torrendon sa mga babayi nga kuhaon ang body number, kompaniya sang taxi kag picturan ang plate number.
Makabulig man kun pahibaluon ang pamilya kun ano nga kompaniya sang taxi ang ginasakyan, lakip na ang body number.
Mas maayo man suno kay Torrendon nga sa backseat nalang masakay kag indi sa front seat agud nga makalikaw.
Nagpanawagan man ini sa mga taxi operator nga pahanumdumon ang mga driver nga likawan ang paghimo sang indi maayo sa babayi nga pasahero bangud paglapas ini sa layi.
Naghingyo man ang WCPD head sa publiko nga likawan ang victim shaming bangud wala sang kahilabtanan ang pamayo sa kaangay nga pag-abuso.
