Gin-ako sang bise presidente sang Taxi Operators Negros Occidental ukon TONO nga kun ang mga drivers ang apektado sila man ang naapektuhan man sang tuman ka mahal nga presyo sang gatong.
Sa interview sang Bombo Radyo kay Benjie Semillano, bangud sa kamahalon sang gatong ang mga driver ang nagaagwanta kasubong man sang mga operators.
Suno kay Semillano, halos nga wala na sang mapauli ang mga driver bangud ang ila income sa ila pagbiyahe ang husto lamang magkadto sa gasolina.
Suno diri, gina-instindi nila ang mga drivers apang paano naman sila nga mga operators nga madamo man sang ginagastohan kaangay sang maintenance sang mga taxi units.
Suno diri, isa tubtob tatlo kaadlaw nga kulang ang ginaremit sang driver ang masarangan pa apang kun halos adlaw adlaw indi na bangud may pamilya man sila.
Dugang pa sini ang iban nga drivers ang nahuya na sa ila nga mga operators gani ang iban ginapili nalang nga mag-untat sa pagbiyahe gani ang ila nga mga units nga nagapundo man.
Wala man ini mahimo bangud indi naman madamo ang pasahero bangud ang tawo ang wala naman sang kwarta bangud apektado man sang krisis.
Magluwas sa krisis sa gatong, apektado man sila sang nagdamo ang Transportation Network Vehicle Service (TNVS).
Samtang ginpahayag man sini nga kuntani gin-una man sang gobyerno nga mahatagan sila sang cash assistance kalakip na ang mga Public Utility vehicles.
Panawagan sini sa national government nga himuan sang tikang nga mabalik ang presyo sang produktong petrolyo sang tinalikdan agud nga bisan wala na sang ayuda kag ang tanan ang indi na mabudlayan.
Suno diri humalin sang nagmahal ang presyo sang gatong, nagmahal man ang tanan.
