Plano sang Samahan ng mga Taxi Drivers sa Bacolod City nga magpadala sang letter kay Mayor Greg Gasataya para mangayo sang bulig bangod tubtob sa karun wala pa gid sila sang may nabaton nga ayuda.
Sa interview sang Bombo Radyo kay Ronald Allan Pelaez Salgado, leader sang Samahan ng mga Taxi Drivers sa Bacolod City, may permahanay na sa tunga sang US kag Iran para sa isa ka kasugtanan sa pagtapos sang gyera apang tubtob sa karun wala pa sang ayuda para sa taxi drivers.
Suno diri, nahatagan na sang fuel subsidy ang transport network vehicle service drivers, tricycle drivers kag jeepney drivers apang sila nga may legal nga mga papeles kag kumpleto nga dokumento, sila pa ang wala may nabaton.
Suno kay Salgado, nagasunod man sila sa proseso, nagpasa sang tanan nga requirements sa Land Transportation Franchising and Regulatory Board Region 6 sa bulig man ni LTFRB – Negros Island Region Director Atty Gerry Llena apang ginapasaligan lamang sila.
Sa karun, wala lamang sila nagasalig sa ila maincome sa byahe apang nagahimo man sila sang pamaagi nga bisan papaano makakwarta para may ipabalon sa ila mga kabataan sa pag-eskwela kag para may ibakal sang pagkaon.
Mensahe sini sa mga taxi drivers nga indi madulaan sang paglaum bangod ginahimo sini ang tanan para mapalab-ot sa gobyerno ang ila problema.
