Halos tanan ang nagawiit kadungan sang pagsaka sang presyo sang produktong petrolyo kaina sang aga.
Nahibaluan nga nagtake effect na kaina sang alas-12:00 ang takna sa kaagahon ang saka sa presyo sang gatong nga nagdangat sa P5.40 tubtob P5.50 sa kada litro sang krudo samtang ang gasolina ang nagsaka naman sang P3.40 tubtob P3.50 ang kada litro.
Suno kay Edgie Lopez, driver sang Fara Faith Taxi, indi na sila makaginansya bangud sa pagsaka sang presyo sang gatong kag nangin kabudlayan na ini sa kasubong niya nga driver.
Suno diri, ang ginapromisa sang Land Transportation and Franchising Board (LTFRB) nga ayuda ang wala man nakalab-ot sa ila.
Pahayag sini nga wala man nagahimo sang tikang ang gobyerno agud nga mapahiagan-hagan ang pagsaka sa presyo sang produktong petrolyo.
Dugang pa sini nga dako na ang kapierdehan sang mga drivers bangud sa presyo sang gatong.
Suno kay Lopez, nagapila na lamang ang mga ini sa mga terminal agud masiguro ang ila nga pasahero bangud sa tion magtiyog lang ang mga ini, mas magasto sa gasolina kag wala man sang kasiguraduhan kun may pasahero nga makuha.
Suno diri, ang taxi ang nagakaon sang P1,300 tubtob P1,500 nga gatong gani kinahanglan nga makakita sila sang P2,500 agud nga may boundery kag may dal-on man sa ila nga pamilya, apang indi nila ini makuha bangud sa malaka man ang mga pasahero.
Ginpahayag man sini nga wala man nadala ang mga taxi drivers sa Pantawid Pasada Program bangud ginhatag lamang ini sa mga jeepney drivers kag operators.
Ginahingyo man sini sa gobyerno nga malakip man sila sa programa.
Suno kay Lopez, ginapaligban sini sa karun kun paano niya masustentuhan ang mga naga-eskwela sini nga mga kabataan.
Suno diri maupod sila sa transport strike kag nagahulat na lamang sila sang signal kun san-o patigayunon.
