Wala ginhimutig sang presidente sang Taxi Operators in Negros Occidental nga apektado ang income sang ila mga driver bangud sa presensya sang online booking cars nga wala sang prangkisa nga una naman nga ginreklamo sang mga taxi driver sa Bombo Radyo.
Sa interview sang Bombo Radyo kay Mario Eusebio, nagagwa sa impormasyon nga ila nakuha sa Land Transportation Franchising and Regulatory Board nga wala pa naaprubahan ang in-drive cars gani sila ang ginakabig nga colorum.
Bangud sini, sila ang pagadakpon kun matabuan sang LTFRB.
Aminado si Eusebio nga nagprotesta sila sadto batok sa operasyon sang Grab kag Here Na apang nakakuha sila sang approval nagikan sa LTFRB.
Gin-ako sang TONO president nga dako ang epekto sang online booking cars sa income sang taxi drivers.
Apang aminado ini nga mas mahal naman ang plete sa online booking cars.
Natalana naman sila nga magtukod sang isa ka asosasyon sang tanan nga operator kag driver sang taxi.
Sa tion nga ini ang matukod, mas dako na ang ila nga tingog kag mahapos nga makapalab-ot sang mga concern sa Benitez administration.
