Gintuman gid sang isa ka working student halin sa EB Magalona, Negros Occidental ang handom sang iya nagtaliwan nga amay nga tapuson niya ang pag-eskwela.
Si Remark de Asis ang nagtapos sa kurso nga Bachelor of Science in Office Administration sa Bacolod City College sang tinalikdan nga Marso 27 kag antes ang iya pagmartsa sa entablado, nagbisita ini sa pantyon sang iya amay sa EB Magalona agud ibalita nga siya ang nakatapos sa likod sang kapigaduhon.
Manicurista ang iloy ni de Asis samtang karga-tapas naman ang iya amay.
Sang yara sa high school si Remark, nakaangkon sang tumor sa ilong ang iya amay gani ini ang gin-operahan apang sang ulihi, ini ang nabulag.
Sang naggradwar sa high school, indi na kuntani magpadayon sa kolehiyo si Remark bangud sa kapigaduhon apang ginduso gid ini sang iya amay nga tapuson ang pag-eskwela.
Sugo sang kapigaduhon, nagtrabaho si Remark bilang kabulig sa balay sa Bacolod City kag nag-eskwela sa Bacolod City College sa kurso nga BS in Office Administration.
Kaagahon pa lang, nagabugtaw na si Remark agud magluto para sa iya mga amo kag kun gab-i naman, nagapanglaba ini antes magtuon sang leksyon sa eskwelahan.
Fourth year college na si de Asis sang nadulaan sang gana nga magpadayon sa pagtuon apang ginbalikan niya ang pangako sa iya amay nga tapuson gid ang pagtuon.
