Dako sa karun ang pressure sa Tay Tung High School sang Bacolod City, nga contender sang Western Visayas sa Palarong Pambansa 2025 bangod sila ang ginatarget sang kalabanan nga mga rehiyon.
Sa interview sang Bombo Radyo Bacolod kay Jose “Boy” Montalbo, manager sang Volleyball Girls sang Western Visayas, nagalaom ini nga makasulod sila sa semi finals kag aminado ini nga ang pinakamabaskog nila nga makontra amo ang National Capital Region kag Region 4A.
Dugang pa sini nga tuman ang preparasyon sang NCR kun sa diin ginhugpong na sang National University ang anom ka dalagkuan nga unibersidad kun sa diin ini ang nagscout sang players gikan sa Far Eastern University, Adamson University, De La Salle University kag iban pa, gani ginatawag man nila ini nga The Avengers.
Sila ang nagkuha man sang duha ka players gikan sa Antique, kun sa diin ang isa ang graduating kag ang isa ang maga-eskwela sa Tay Tung.
Suno diri, target sang halos tanan nga rehiyon nga maagaw sa ila ang titulo ilabi na nga duha ka magkasunod nga tuig nga Tay Tung ang nakasungkit sang championship.
Magapabilin naman nga si Brian Ang ang captain sang volleyball girls.
Aminado si Montalbo nga nadula ang focus sang mga players sa hampang bangod sa pressure.
Gani ginpahanumduman niya ang mga ini nga indi pagpinsaron ang pagchampion sang tinalikdan nga Palaro, sa baylo magfocus lamang sa karun nga hampang.
Sila ang magahampang bwas batok sa Region 1 sa udto, kag kaupod man nila sa bracket ang Region 5 kag 11.
Sila ang nag-abot sa Laoag City, Ilocos Norte sang Lunes kag nagatraining sang apat ka oras kada adlaw.
Wala ini nagsulod sa billeting school, sa baylo nagpangita sang airconditioned nga balay nga marentahan si Montalbo para sa mga kabataan.
May chinese school man nga nagpahulam sa ila sang court, apang mabudlay sa training bangod sa tuman nga kainiton, kun sa diin nagadangat pa sa 44 degrees Celsius ang Heat Index.
Ginapakamaayo man sini nga airconditioned ang ila nga playing venue sa Bacarra, Ilocos Norte.
