Nahatagan na sang solusyon ang madugay na nga ginaproblema sang mga pumuluyo sa Barangay Camangcamang, banwa sang Isabela, Negros Occidental matapos nga mahuman na ang Guintubhan bridge.
Kahapon, ginpangunahan ni Negros Occidental Governor Eugenio Jose “Bong” Lacson ang inagurasyon sang taytay nga nahuman matapos ang malapit duha ka tuig nga construction.
Ang taytay ang nagabalor sang P60 million kag may kalabaon nga 100 meters nga may 5.60 meters nga carriage way.
Suno sa pahayag sang gobernador sang gin-inagurahan ini, ang taytay ang sarang maagyan sang mga pumuluyo sang barangay kag mga kaiping nga kabarangayan sang banwa kag mahimo man ini nga maagyan sang mga salakyan.
Nagalaom man ini nga ang taytay ang makabulig sa pagpatigayon sang madamo nga economic activities kag madamo nga development sa kaiping nga mga kabarangayan.
Samtang, ginpahayag man ni Mayor Irene Montilla, alkalde sang Isabela, Negros Occidental nga nalipay ini kag tuman ang iya pagpasalamat sa Provincial Government sa proyekto nga makahatag sang pagbag-o sa mga komunidad.
Nagapasalamat man ang mga tricycle drivers sa taytay bangud nagakahulugan ini sang kahilwayan sang mga residente sang komunidad nagikan sa peligro sang baha.
Ginhanduraw man sini nga ang taytay ang himo sa kahoy kag ginguba sang mga nakaligad nga bagyo, gani nagapasalamat ini sa Provincial Government sa konkreto nga taytay nga gin-umpisahan sa pag-ubra sadtong tuig 2018.
Madumduman nga isa ka residente sang Barangay Camangcamang, Isabela ang nagdangop sa Bombo Radyo sang tuig 2016 agud magpangayo sang bulig nga mapatindugan sang taytay ang naguba nga overflow bangud mabudlay para sa ila ang pagtabok kun nagaulan kag nagabaha.
Gintinguhaan naman sang administrasyon ni anay Governor Alfredo Marañon Jr. nga makapangita sang pondo kag gin-islan sang taytay ang naguba nga overflow.
